వీడే…. ఆ మాటలన్నీ మోసాడు

చిక్కటి రాత్రిలోనూ, పగటి మేఘంలోనూ

మోసాడు... మాట బరువంతా!

పదాల పదునంతా కాపుకాసాడు

మనలోనూ వీడే, మనుషుల్లోనూ వీడే

పొక్కిలి చేసేదీ వీడే, ముగ్గులు వేసేదీ వీడే

వీడే మన మనోడు

మనందరిలోనూ మసలే మనసున్నోడు

మిణుగురు పురుగుల నీడల్లోనూ

రెప్పలకిందటి చీకటిలోనూ వెలుగుతూనే ఉంటాడు

బరువెక్కిన మనసునెప్పుడో ఈదేసాడు

గుండెలో చేరిన చెమ్మని వెన్నమూటలో కట్టేసాకె

దానికి మాటనివ్వలేకపోయానెప్పుడూ....

అప్పుడే వచ్చాడీడు ఓ పదాన్ని వెంటేసుకుని...

నీకెందుకు నేనున్నానంటంటూ....

నాతోనే ఉన్నానంటూ……ఉంటూనే ఉన్నాడు

మాటని మంత్రం చేసి మరీ తప్పుకున్నాడు

అప్పుడు కదా అర్ధమయింది

"ఘోరీలు కట్టేది వీడే...గోడలు కూల్చేది వీడే...."

వీడే నా అద్దం!

నా తరఫున మాట్లాడేది వీడే

వీడి పేరే అక్షరం

ప్రేమా! నీకు జోహార్లు!

కిటికీ రెక్కలపై చినుకు సంతకం

నువ్వొచ్చావనే నమ్మకమైన ఫీల్! అందమైన ఓ అందాజ్

నీ అనుభూతికింత ఎడిక్ట్ అయ్యానన్న తప్పే కానీ

తప్పేముందిలే అన్న పట్టుదలా లేకపోలేదు

***

 రాత్రిని వెన్నెలని కవ్వంతో చిలికితే వచ్చేమాటలన్ని

నీగురించేనన్నదొక్కటీ చాలదూ--

ఇలా రాస్తుండటానికి?

నిన్నూ నన్ను కలిపినవే మాటలేకరువైనా

తీరా నువ్వొచ్చేసరికి మాటలకరువు

ఎప్పుడూ ఉండేదే!

 ***

ఎగిరెగిరిపడే నీ గుండెలకి

సముద్రమూ అసూయపడిందేమొ

నాకేం చెప్పకనే వెనుతిరుగుతుంది…..నీలా

ఏకొద్దిసేపో ఇద్దరిమధ్యా మౌనం

గుండాగినంతపని కొన్ని క్షణాలకి....

ప్రేమ అడుగుల చప్పుడు గుండెలపై సున్నిత మోత

చీరకుచ్చెళ్లకీ సంగీతముంటేనా అని

అనుకోని క్షణముందా....

 ***

నాజూకు వర్షపు చినుకుల పరిమళం

నీగుసగుసలపలకరింపులా...పరిచయమే

కనీసం ఈ క్షణం బంధీ నాలో

నీకోసమేనన్నట్టు...ఓ ప్రేమాక్షరాల బొకె
***

మనసుందని ప్రేమించలేను--మనసే ప్రేమైనప్పుడు

నువ్వు లేవనీ అనుకోలేను--ప్రేమే నువ్వైనప్పుడు

॥నీలోకి ప్రయాణమింతేనేమో॥

ఆర్టిఫిషియలో....హార్ట్ ఫిషీనో

నువ్వెలాగూ గుంభన మౌనమే....

ప్రేమిస్తూ బయటపడవు....నీ మనసులా

కొన్ని క్షణాలకి మాటలుంటేనా అని అనుకోని క్షణముండదా?

కాఫీడేలో కాపుచ్చినో మీసాలకంటుకుని వేస్టయినట్టు

హఠాత్తైన నీ చనువు ముడుచుకుపోతుందెక్కడో

నీ పెదాల బలంముందు ప్రేమ ఓడిపోతుందేమో

ఆ జడెందుకలా అక్కడె ఆగిపోతుంది.....

అద్వైతానికి సింబలిజంలా ఆ జఘనాల మధ్యన

అక్కణ్ణుంచి ఊహించమంటూ......

తెల్లకాగితంపై సిరా మచ్చలా వదిలేస్తావా ఏం?

నా ఈ చుక్కలన్నీ నీకు గీతంటావేమొ....

థార్న్‌‌డైక్ కండిషనింగ్ గురించి చేపల్నడగాలి నా అక్వేరియంలో!

'వాటిక్కావాల్సినవాటికోసం అవే వస్తాయి'   అన్న థార్న్‌‌డైక్

గోశాలలొ కృష్డుడన్నట్టు గోవులభాష మనకేం తెల్సులే

మరి నీ ప్రేమ భాష నాకు చెప్పేసే పనేం పెట్టుకోవా?

చెప్పీ చెప్పనట్టుగా......ముడెయ్యని కొప్పులానా?

నుదుటచేరిన ఆ రెండు స్వేదబిందువులే

మన ప్రేమ కథ చెప్పకనే చెప్తుంటాయనా....

జీవితంలో ఆ క్షణమే శాశ్వతమన్న నీ కళ్ళలోని ఆ ఆనందం.....

మరో కవితకి కథ కాకూడదన్నదే నీ మనసులోని మాటా?

అదె కన్పడుతోందిలే...ఆ క్షణంలొ ఆ కళ నీ కళ్ళలొ

మాట కందని తడి……

భూమధ్యరేఖలా నీ నడుం చుట్టూ ఆ మొలతాడులా

నేను నీ చుట్టూ ఉంటాననే నీ ప్రేమ…

ఓ అధ్బుత సున్నా! ‘నిహిలిజాన్ని నువ్వూ ఒప్పుకుంటావుగా!’

రీఇన్‌ఫోర్స్‌‌మెంట్ టెక్నిక్ నీకు తెల్సినట్లుగా ప్రేమకూ తెలీదనుకుంటా

స్కిన్నర్ ఓడిపోతాడులే నీ ప్రేమ తత్వానికి.....'స్కిన్నర్ బాక్స్' కి ప్రేమ లొంగదుగా

ఏ కండిషనింగ్ ప్రేమ కందదని చెప్పేయనా మరి?

నీలోకి ప్రయాణమింతే....ప్రేమ ప్రయాణం

ఓ ప్రేమ ప్రయాణం….మనసుని నడిపించే అద్భుత ప్రయాణం...

మనిద్దరి మసనుల్లాగనె –

ఇలా హఠాత్తుగా ఆపేస్తానని కోపమా

మరి ఇంకెం నీకఖ్ఖర్లేదుగా,  ప్రేమ తప్ప

ఒక్కమాట చెప్పు-- మనసంతా నేనే ఉంటానన్న మాట

ఓ ప్రేమ మాట….జీవితమంతా ఉంటానన్న మాట

నాచివరి ప్రయాణం…..నీ ప్రేమలోకి

                              ----వాసుదేవ్

(ఓ ప్రేమ మానసి అభేదంగా అడిగిన మీదట....)

ప్రేమ సూక్తం

నీ ఊసుల్లా ఈ కవితకీ మొదలూ చివరూ ఉండదులే

ఊహల్లో దూరాన్ని భర్తీ చేసే నీ 'ఊ' లే అన్నీ

నా ఊపిరిలో భగ్నమైన అ రెండు క్షణాలనీ బంధించాలనుంది

అవైనా నీ ప్రేమని చెప్తాయా?

అప్పుడప్పుడు అక్షరాలపై జాలేస్తుంది

ఎంత నిశ్శబ్దాన్ని మోస్తాయని!

ప్రేమని చెప్పలేక జారుకుంటాయి, అమాయకంగా!

నువ్వు గుసగుసలాడిన మాటలన్నీ

నడుందగ్గర ఓడిపోయాయిగా

ఆ క్షణాన్ని ప్రేమీకరించి మనసుదగ్గరొదిలొదెయ్యనా

నువ్వేదో అన్నావే....ప్రేమని గెలిపిద్దామా అని

అదెంత సమ్మోహితమైందనో....

నువ్వు ఉన్నవన్నీ జలతారు క్షణాలే

మనమధ్య ఉండలేక జారిపోతుపోతుంటాయి

ప్రతి సాయంత్రానికి ప్రేమ గంధం పూయాలిక

ప్రతీ వర్షపు గోళపు తాకిడిలో

మువ్వలూ గజ్జెలూ

కొన్ని వేల పారిజాత సువాసనలు

ఓ పసుప్పచ్చ ఆకాశం మనకో సాక్షి!

కొన్ని స్వీట్ నథింగ్స్ ని చెవిలో వదిలేయ్

వాటికర్ధానద్దుతా

వాటిని మనిధ్దరిమధ్యా జొనిపోద్దాం

నడుముకీ చీరకుచ్చెళ్లకీ ఇరుక్కునిపోతాయి

అగమ్యగోచరంలా...

శ్రావణమేఘంల్లొకీ ఓ ప్రవేశం!

నెను నీలోకెళ్ళిన ఆ మధురక్షణం

అదె ప్రేమాక్షరం

ప్రేమ సూక్తం లా

ఏం చెప్పను? చెప్పకుండానే చెప్పిస్తావుగా

ప్రేమ సూక్తంలా....

మనసునేవీ మభ్యపెట్టవు

నువ్వు తప్ప...

అప్పుడెప్పుడొ నువ్వొదిలిన నిట్టూర్పే

ప్రేమ కవితైంది నీలా అందంగా....

ప్రేమగా!

ప్రేమాస్వాదనం

ప్రేమాస్వాదనం

హరివిల్లుని చీరకట్టి ఆకాశాన్ని తీసుకురా

నీకు ప్రేమనిస్తాను

మేఘాలకి పాటనేర్పి రెక్కలుకట్టుకురా

నీకు ప్రేమనేర్పిస్తాను

ఇద్దరం కల్సి ఓ ప్రపంచం నిర్మిద్దాం

ఏ గోడల్లేని ప్రేమప్రపంచం.....

అందాన్నంతా తనలో ఇముడ్చుకున్న

ప్రేమే సుందరం…..

నీ సమక్షంలో ఓ ప్రేమికుణ్ణవుతాను

నీ పరోక్షంలో కవినౌతానని గర్వం

ఎందుకంటే

ప్రేమే సత్యం…..

మధుమాసపు తొలిమంచు చీరలో

పారిజాతాసుమగంధ మర్దనమార్దవంలొ

నిట్టూర్పుల భాషలో ఇద్దరం ఒకటైనప్పుడూ

రసాస్వాదనలో ప్రేమ సాత్కాక్షరించినప్పుడూ

ఒకటే నిజం

ప్రేమే శివం….

అవునవును, ప్రేమే

సత్యం-శివం-సుందరం

("ప్రేమ" పుట్టినరోజుకి కానుకగా నా ఈ చిన్న బహుమతి)

14. Feb. 2013

కన్ఫెషన్స్

1.

రాత్రిపై నుంచి నడిచొచ్చానా
గుప్పెడంత చీకటినీ తెచ్చుకోలేకపోయాను!
కళ్ళకింద కలలన్నీ కన్నీళ్ళలో
కదులుతూ
కథలుగా మారలేకపోయాయి
2.
ఓ అక్షరంలో కూర్చుని మరొకదాంతో
చెప్పుకుంటూ ఉంటాను
ప్రతీపదం ఓ కన్ఫెషన్ బాక్స్ మరి...

నా కథల్ని నేనే రాసుకుంటానిక్కడ

3.
దొర్లుకొస్తున్న ఖాళీ సీసాల్లా కొన్ని జ్ఞాపకాలు
ఖాళీలకి ఫ్రేముకట్టి మరీ మోస్తాయి..
సమాధికాబడని జ్ఞాపకాలు కొన్ని!
తడిసిన కాగితంలోని అలుక్కుపోయిన అక్షరాల్లా
ఈ జ్ఞాపకాలు....
4.
అర్ధంకాని బంధాలేవో
పేపర్ వెయిట్‌‌లా జీవితావేశాన్ని
అదిమిపెడుతుంటాయి
తేమకీ, తడికీ తేడాతెల్సెదెప్పుడు
ఆర్ద్రతెప్పుడో ఆవిరై ఆరిపోయిందిలె

5.
సమాధిలో శవానికి మిత్రుల్లేరన్న
'గాలి' ఊళల్లోని మాటలు కొన్ని చెవిదాటిపోవు
అవును
పిరమిడ్లలోని రాళ్ళేవీ
జీవితతంలోని డొల్లతనాన్నీ నింపలేవు
నా దృష్టినీ అడ్డుపెట్టలేవు
అయినా ఏం చూస్తున్నానని?

6.
అరువుతెచ్చుకున్న మేధోతనమేదీ నిలబడదు
చిన్న ఒంటికి పెద్ద అంగీలా
అసహజంగా, అసమానంగా....
7.
విస్తరించుకుంటున్న శూన్యత
ఆఖరికి ఈ పాపనివేదన గదిలోనూ...

జీవితం దాని కథల స్క్రీన్ ప్లే అది రాసుకుంటుందికదా

నువ్వూ, నేనూ…. ఓ ద్వీపం!

నీలోని నిన్నునొదిలేసొచ్చేయ్
మనిద్దరం ఓ ద్వీపమౌదాం
శతాబ్దాల చరిత్ర మౌనంపై నడిచొచ్చేయ్
ఓ విశ్వ శకలమవుదాం
అన్నింటినీ కత్తిరించేసుకుంటూ….

స్పెర్మ్ తీకాలోని జీవకణంలా ఓ దిశకోశం నేనూ
వెల్వెట్ స్వప్నాలంచులపై నిల్చొని నువ్వూ
ఒక్క కలైనా నిజం కాకపోతుందాని….

ఓ ఉల్కపైనో, స్వాతిముత్యంపైనో
మాటలుకట్టుకున్న నా సంతకం నిన్ను పలకరిస్తుంది

గులిస్తాన్లో గుల్మొహర్లు దోపుకున్న వనకన్యలా నువ్వు
నా పలకరింపుఅంచు పట్టుకుని వస్తావులె
***
ఓ నిర్వికల్వంలో ఇద్దరం
నిర్విష్టంగా కలియతిరుగుతూ….ద్వీపమంతా
నేలంత జాగ్రత్తగా గుండెల్లో దాచుకుంటావుగా!

ఓ సారి ఔనన్నాక
నీకు తెల్సా? మాటకీ సుఖం, మౌనానికీ సుఖం
మాటల్ని పొదువుకున్న మనసుకీ సుఖం

నువ్వొచ్చాకనే నా వెతుకులాట ఆగింది
తెల్సిందిదే–
దు:ఖం అనివార్యం
ప్రేమ అవిభాజ్యం
క్షమ అనిత్యం
***
అయినా–
కాలం తాళం తీసి మరీ నిన్ను లాక్కుంటానా
నీ చిర్నవ్వుతో ఆ రాత్రిని వెలిగించుకుంటాను!
నువ్వూ నేనూ…ఆ ద్వీపం!